Maksim Caslli është emëruar Anëtar i Bordit të Drejtorëve në mars të vitit 2023. Gjatë vitit 2022 ai ka qenë këshilltar i jashtëm i Bordit të Drejtorëve. Z. Caslli është pronar dhe Drejtor Gjeneral në American Capital, një kompani këshilluese dhe investuese me portofol investimesh në teknologjinë e informacionit, shërbimeve financiare dhe të kontabilitetit, shërbimeve të konsulencës, agroturizmit, bujqësisë, tregtimit me shumicë dhe pakicë të ushqimeve dhe ndërtimtarisë. Ai ka një përvojë të gjatë duke filluar nga angazhimi i tij në Deloitte nga viti 1995 deri në vitin 2021. Ai themeloi Deloitte në Shqipëri në vitin 1996, më vonë në Kosovë në vitin 2000 dhe për 7 vjet ishte në detyrë si Partner Menaxhues për Deloitte në rajonin e Ballkanit, duke udhëhequr Deloitte në Rumani, Bullgari dhe Moldavi.

Caslli ka një diplomë Master në Marketing dhe Strategji nga Shkolla Norvegjeze e Menaxhimit dhe është ka diplomuar në drejtimin Inxhinier Mekanik në Universitetin e Tiranës. Ai ka shkollim të nivelit ekzekutiv edhe nga universitete prestigjioze si Shkolla e Biznesit në Harvard, Shkolla e Biznesit në Londër, Universiteti i Virxhinias, Shkolla e Biznesit në Vjenë, Universiteti i Floridës në fusha që lidhen me bashkimet dhe blerjet e kompanive, kapitalin privat dhe kapitalin sipërmarrës, zhvillimin e lidershipit, financimin e projekteve për PPP etj.

Visar Bytyqi është emëruar Anëtar i Bordit të Drejtorëve dhe Kryesues i Komitetit të Auditimit të bankës BPB në gusht 2018. Z. Bytyqi ka punuar në pozicione të larta drejtuese për më shumë se 10 vjet në Deloitte dhe Grant Thornton. Ai ka përvojë të konsiderueshme financiare dhe audituese dhe ka ofruar shërbime për entitetet qeveritare, korporatat e listuara publike, kompanitë shumëkombëshe dhe shumë entitete të sektorit privat në Kosovë. Z. Bytyqi aktualisht është ligjërues në një nga Organizatat Profesionale të Kontabilitetit në vend dhe anëtar i Bordit të Drejtorëve në një nga korporatat më të mëdha të Kosovës.

Përvoja e tij e mëparshme, ndër të tjera, përfshin gjithashtu anëtar i Këshillit Kosovar për Raportim Financiar, anëtar i bordit të drejtorëve dhe kryesues i komitetit të auditimit të kompanisë së parë të sigurimeve në Kosovë. Z. Bytyqi është anëtar i Association of Chartered Certified Accountants – ACCA (UK) dhe Kontabilist dhe Auditor i Çertifikuar në Kosovë. Ai ka diplomë bachelor në Menaxhment dhe Informatikë nga Universiteti i Prishtinës.

Paul Nabavi i është bashkuar Bordit të Drejtorëve në qershor, 2023. Ai ka më shumë se tridhjetë vite eksperiencë në sektorin bankar dhe financiar, në tregjet në zhvillim dhe ato kufitare në mbarë botën. Në “CDC Group”, tani British International Investment ai krijoi dhe drejtori ekipin e institucioneve financiare, dhe ishte përgjegjës për investimet e reja dhe klientët e sektorit financiar të CDC-s në Azi, Afrikë dhe Amerikë Latine. Nabavi ka qenë gjithashtu drejtor në një kompani financiare që operonte në Havana, Kubë.

Ai ka punuar për Actis LLP (kompani me kapital në tregjet në zhvillim) para se të fillonte punën në BERZH (Banka Evropiane për Rindërtim dhe Zhvillim). Në BERZH, ai ka specializuar për investimet kapitale në institucionet financiare duke mbikëqyrur si bizneset e reja e gjithashtu edhe investimet e portofolit në banka dhe biznese të tjera të shërbimeve financiare në të gjithë rajonin e BERZH-it.

Nabavi është trajnuar dhe kualifikuar si kontabilist i autorizuar në Mbretërinë e Bashkuar. Ai ka diplomuar në nivelin master në Universitetin e Oksfordit. Aktualisht është Drejtor i First Bank SA në Rumani dhe më parë ka qenë anëtar i Këshillit Mbikëqyrës të Union Bank of Albania. Ai është gjithashtu një drejtor i besuar në organizatën “World Child Cancer”.

Znj. Shkëndije Himaj është emëruar Anëtare e Bordit të Drejtorëve në shkurt 2026.

Shkëndije Himaj është themeluese dhe Kryeshefe Ekzekutive e Finance in Action, një kompani konsulence në shërbime financiare e fokusuar në zhvillimin e financave të diversifikuara dhe rritjen e qëndrueshme. Para këtij angazhimi, ajo ka shërbyer si Udhëheqëse për Financat e Diversifikuara në kuadër të projektit DT Global–USAID, ku ka udhëhequr iniciativa strategjike në sektorin financiar të Kosovës, me theks në zhvillimin e formave alternative të financimit dhe avancimin e tregjeve të kapitalit.

Me mbi 18 vite përvojë në role udhëheqëse në Bankën Qendrore të Republikës së Kosovës, znj. Himaj ka mbajtur pozita të larta në fusha si mbikëqyrja financiare, stabiliteti makroprudencial, menaxhimi i rrezikut dhe marrëdhëniet ndërkombëtare. Në cilësinë e saj si ish-bankiere qendrore, ajo ka luajtur një rol të rëndësishëm në ndërtimin e arkitekturës financiare të Kosovës, duke kontribuar edhe në themelimin e institucioneve kyçe si Fondi Kosovar për Garanci Kreditore dhe Fondi i Sigurimit të Depozitave të Kosovës.

Në fazat e hershme të karrierës, znj. Himaj ka punuar në sektorin jofitimprurës në Kanada si Koordinatore e Programeve, duke fituar përvojë të vlefshme në zhvillim ndërkombëtar. Ajo është e angazhuar aktivisht në projekte që lidhen me financat e diversifikuara, qeverisjen korporative, lidershipin, zhvillimin e politikave dhe fuqizimin e grave.

Ajo ka përfunduar studimet në Ekonomi në Universitetin e Prishtinës dhe në University of Western Ontario, si dhe ka ndjekur programe të avancuara ekzekutive në institucione ndërkombëtare si Banka Qendrore Evropiane, Fondi Monetar Ndërkombëtar, Banka Botërore, Federal Reserve System, Joint Vienna Institute dhe Departamenti i Shtetit i SHBA-së. Aktualisht është në përfundim të studimeve të doktoratës (PhD) në Fakultetin Ekonomik të Universitetit të Lubjanës.

Znj. Ardiana Bakija është emëruar anëtare e Bordit të Drejtorëve në mars të vitit 2022. Përvoja profesionale e znj. Bakija ka filluar nga shoqëria civile në fillimin e viteve 2000, ku ajo ka dhënë kontributin e saj në spektrin ligjor të zbatimit të projekteve në fushën psiko-sociale. Karriera e saj ka vazhduar në industrinë bankare në gjysmën e dytë të viteve 2000, fillimisht në Bankën Ekonomike, në pozita udhëheqëse në nivel njësie dhe departamenti në fushën specifike të Pajtueshmërisë dhe të Parandalimit të Pastrimit të Parave. Përvojën në këtë fushë dhe në këtë nivel udhëheqjeje znj. Bakija e ka vazhduar edhe në Turkiye IS Bankasi, dega në Kosovë deri në vitin 2020.

Gjatë viteve të fundit znj. Bakija i është bashkuar Fondit për Eficencë të Energjisë (FKEE) në pozitën e Udhëheqëses së Shërbimeve të Përgjithshme. Kontributi i saj në këtë institucion konsiston në draftimin dhe monitorimin e marrëveshjeve financiare dhe atyre për shërbime të energjisë, të cilat po zbatohen për herë të parë ne Kosovë. Po ashtu znj. Bakija është përgjegjëse për mbikëqyrjen e departamentit të burimeve njerëzore dhe prokurimit.  Znj. Bakija është e diplomuar në Fakultetin Juridik të Universitetit të Prishtinës dhe është e certifikuar ndërkombëtarisht në fushën e Pajtueshmërisë dhe PPP dhe po ashtu edhe në sektorin e Eficencës së Energjisë.